O Concello de Dodro convocará o premio Eusebio Lorenzo Baleirón sen o apoio da Xunta

A vindeira edición do Premio de Poesía Eusebio Lorenzo Baleirón, que convoca desde 1988 o Concello de Dodro, desenvolverase sen o apoio da Xunta de Galicia. Así o comunicou o Concello a través da súa conta de Facebook, a sinalar que a Consellería de Cultura non dispón das súas contas dunha partida destinada a este fin. Segundo explica a institución local, o departamento autonómico sinalou, xa no pasado mes de febreiro, que a non presenza do logotipo da Xunta na publicación da obra gañadora no último ano levou á retirada deste apoio. Desde o Concello, segundo sinala este comunicado, remitíuselle unha carta á Dirección Xeral de Políticas Culturais a indicar que hai anos que non se inclúe este logotipo na publicación e que, tal como establece o convenio entre institucións, o mesmo aparece en todas as comunicacións públicas sobre o certame.

O Concello de Dodro amosouse ademais disposto a resolver a cuestión do logotipo sen que, polo momento recibisen resposta desde a Consellería. Ante a situación, a Concellaría de Cultura e Patrimonio do Concello de Dodro "está firmemente disposta a seguir co Premio Eusebio Lorenzo Baleirón aínda que a Xunta de Galicia, e neste caso a Dirección Xeral de Políticas Culturais, non colabore e apoie o premio de poesía mais sobranceiro e importante de Galicia como fixo nos últimos catro anos", segundo sinala no comunicado.