A produtora galega Somadrome obtén un premio no MIPDoc de Cannes

Por vez primeira o proxecto dunha produtora galega obtén un galardón no MIPDoc de Cannes. A produtora Somadrome, radicada en Oroso, fíxose co galardón da categoría MIPDoc Project Pitch polo seu proxecto Behind Lucy. Este é un formato documental que segue ao longo de catro anos, entre 2017 e 2021 a misión da NASA Lucy, destinada a investigar asteroides da órbita de Xúpiter. Este encontro internacional de formatos documentais desenvolveuse este ano en liña no marco da iniciativa MIPTV Online+, logo da suspensión do mercado televisivo por mor da crise sanitaria do coronavirus.

O MIPDoc, que se celebra cada dous anos, amosa en cada edición cinco proxectos internacionais entre os que se seleccionan os gañadores. O proxecto galego, canda a proposta de concurso televisivo Before you hit the floor foron as dúas únicas propostas do Estado que participaron de xeito pioneiro nesta iniciativa, resultando ademais galardoadas.