De xeito independente á crise do Coronavirus, aínda que pendente de como se desenvolva esta, o Festival Revenidas muda as súas datas. A vindeira edición do evento trasládase de mediados de agosto aos días 11,12 e 13 de setembro. A organización apostou por este cambio para evitar a competencia de citas musicais que se daba nas datas orixinais. O que se mantén no entanto, malia aos debates que se sucederon nos últimos meses co goberno de Vilagarcía, é a localización do evento, que continuará como ata o de agora a se desenvolver en Vilaxoán. A organización presentou xa a imaxe da nova edición, sen adiantar polo momento os nomes que comporán o cartel.
