A AGAL leva a Carballo Calero ás aulas con varias unidades didácticas

A Associaçom Galega da Língua acaba de publicar no seu web unha serie de unidades didácticas sobre o autor e a súa obra destinadas a diferentes niveis de ensino. A materiais xa publicados como a Guia de leitura de Scórpio, elaborada por José Antom Serém, a entidade suma agora unha unidade didáctica sobre a obra de Teresa Crisanta, a Leitura feminista de Scórpio de Susana Arins, unha proposta para traballar o autor en ensino infantil e primario da man de Laura García Díaz, dúas máis para secundaria a cargo de Marisa Moreda e a unidade didáctica À descoberta de Carvalho, desenvolvida por Bernardo Penabade para Bacharelato. O material está dispoñible tanto en norma AGAL como en ILG no site carvalho2020.gal. No web tamén se pode realizar a inscrición para a lectura continuada de Scórpio que a entidade convoca para o vindeiro 16 de maio.

Pola súa banda, a editorial Galaxia acaba de presentar a reedición de Conversas con Ricardo Carballo Calero. O libro recolle unha longa entrevista de Carmen Blanco do homenaxeado neste Día das Letras que se desenvolveu entre 1983 e 1984 e que viu a luz por vez primeira en 1989. No volume, o autor abordar "algúns temas esenciais, como a biografía, a política, a formación intelectual, a crítica literaria, a lingüística, a poesía, a narrativa e o teatro. A través deles vaise configurando a imaxe dunha personalidade enteiramente entregada ao ideal patriótico", segundo explica a editorial.