A AGAL achega novos contidos sobre Carballo Calero nunha web monográfica

Chegan á rede o documental Vieiros de esperanza e unha entrevista de Ramom Reimunde

Imaxe de Pancho Lapeña para Carvalho2020.gal
Imaxe de Pancho Lapeña para Carvalho2020.gal
Malia ao traslado ao outono dos actos promovidos pola Real Academia Galega, continúan a aparecer iniciativas para conmemorar a Ricardo Carballo Calero nas proximidades deste 17 de maio. Deste xeito, esta semana a Associaçom Galega da Língua (AGAL) presentaba o web Carvalho2020.gal, que se reivindica como "o máis completo site" sobre o autor. O espazo na rede recolle artigos sobre o profesor e a súa obra, fichas de toda a súa produción e abondoso material descargable, entre o que está unha colección de unidades didácticas sobre o autor. Ademais, inclúe unha sección dedicada á actualidade das celebracións deste Día das Letras.

O web, desenvolvido co apoio da Secretaría Xeral de Política Lingüística e mais a Deputación da Coruña, acollerá en breve os contidos da exposición A voz presente, realizada por Ouvirmos e que percorrerá da man da Xunta diferentes localidades do país. Tamén se publicará neste espazo o documental De Carballo a Carvalho que promove a AGAL.

Do mesmo xeito, chega á rede nas vésperas do Día das Letras Vieiros de esperanza/i>. O documental que dirixiu en 2014 Antón Rodríguez Fernández sobre a figura de Carballo está dispoñible íntegro para a súa visualización a incluír entrevistas sobre o autor con Darío Villanueva, Víctor Freixanes, Xesús Alonso Montero, Pilar García Negro, Araceli Herrero, Francisco Rodríguez ou Xosé María Dobarro Paz.



A Academia Galega da Língua Portuguesa, pola súa banda, subiu á súa canle de Youtube a conversa que mantivo co profesor en 1985 Ramom Reimunde. O material, que serviu de base a unha entrevista publicada na revista O Ensino, foi dixitalizado e editado para conseguir a máxima calidade. A institución, que publica o vídeo baixo licenza Creative Commons, ten a disposición do público unha versión en mellor resolución para proxeccións e outros usos.