Músicas 'urbanas', nomes populares e aumento da presenza galega no IIIº Son do Camiño

As filtracións que os medios de comunicación avanzaban nos últimos días sobre o cartel do festival O Son do Camiño non ían erradas en absoluto, demostrando que cada vez resulta máis complicada a estratexia comunicativa de agardar a unha rolda de prensa oficial encabezada polo representante da Xunta para desvelar os nomes do programa dunha soa vez. Hoxe a Cidade da Cultura volveu a albergar a rolda de prensa de presentación do evento promovido polas empresas Esmerarte e Bring the Noise, convocada para os medios en exclusiva desde os gabinetes oficiais da Xunta. O conselleiro de Cultura e Turismo, Román Rodríguez, xunto coas empresas organizadores presentou as novidades do evento que se celebrará no Monte do Gozo os días 18, 19 e 20 de xuño.

Confirmouse a aposta xa avanzada en varios medios polas músicas urbanas -unha etiqueta tan ampla como inxusta- con estrelas do reggaetón coma os portorriqueños Daddy Yankee e Bad Bunny xunto aos artistas do hip hop como o veterano Kase.O ou os populares Natos & Waor. Ademais deles, en clave máis pop e rock internacional os encabezamentos inclúen ao ex Oasis Liam Gallagher, ao estadounidense Jason Derulo e ás bandas The National, Editors e Foals. A electrónica e a música de baile de club as porán The Chemical Brothers e os Dj´s Armin Van Buuren, Timmy Trumpet e Dj Shake. Con estes nomes "grandes" como gancho principal, a parte media deste cartel da terceira edición de O Son do Camiño reforza respecto a anos anteriores a presenza da escena musical galega conseguindo ser un escaparate da nosa música, que, en termos xerais, representa o 40% da programación grazas a 15 presenzas con diferentes estilos e pasando por diversas franxas de idade, entre os cales destacan Xoel López, Triángulo de Amor Bizarro, The Killer Barbies, Budiño, Guadi Galego, Presumido, Sen Senra, Wöyza, Furious Monkey House, Boyanka Kostova ou Cora Velasco entre outros. A distribución dos artistas por días, horarios e escenarios aínda non se coñece. Como novidade loxística este ano o recinto ampliado en aforo por riba dos 30.000 asistentes diarios, contará cun terceiro escenario para as actuación musicais. Os abonos poñeranse á venda a un prezo inicial de 59 euros (menos de 20 euros por día) o martes 10 de marzo ás 14h. na web de entradas Eventbrite.

Portamérica pecha cartel e outros van medrando

Unha das empresas organizadoras do festival santiagués, Esmerarte, é tamén a promotora do festival Portamérica, que este ano se celebrará na súa ubicación xa consolidada de Caldas de Reis entre os días 2 e 4 de xullo. O evento ven de pechar o seu cartel e dar a socorrida distribución por días das actuacións. Entre as recentes confirmacións do Portamérica 2020 hai tamén unha marcada presenza de bandas galegas, algunha que xoga en casa como Igloo e outras que case, como Novedades Carminha, Eladio y los seres queridos e Tony Lomba & Elio dos Santos. O resto de nomes, ata os 14 deste peche de cartel son os de Beret, Devendra Banhart, Gustavo Santaolalla, Victor Coyote, Wyoming y los Insolventes, Esteman, Alice Wonder, Monterrosa, Dani e Ultima Experiencia. Súmase os 25 cos que xa partiu a primeira tanda, confirmado así este evento como un dos máis importantes do verán galego.

En Ourense tamén vai enchéndose o cartel, aínda sen pechar, do Ourenrrock Sound, que entre o 28 e 30 de maio converterá Bemposta na capital do rock do país. Trece son os nomes, xa distribuídos en días, que ofrece arestora o evento para esta Vª edición e entre os que hai tamén representación da escena musical do páis: Los Chikos del Maíz, Boikot, Nativa, Hard Gz, Anarchicks, Derroche, Nimedia, Novedades Carminha, Rayden, Dakidarria, FMH, Balkan Bomba e Playa Cuberris. Outros festivais de verán do país como Arbo Rock (17 e 18 de xullo) están tamén estes días facendo confirmacións da súa oferta aos poucos mentres que algúns como os SilFest Valdeorras (23, 24 e 25 de xullo) xa teñen avanzados varios nomes como Sex Museum, Presumido, Agoraphobia, De Vacas, The Levitants, Alberto & García e Veintiuno.