Plano de Mondoñedo. Fonte: Concello de Mondoñedo.
A Xunta de Galicia declarou o conxunto histórico de Mondoñedo, ademais de dúas áreas anexas, como primeira Área Rexurbe de Galicia. Esta consideración, prevista na Lei de rehabilitación e rexeneración e renovación urbanas de Galicia prevé medidas de rehabilitación integral de edificios que complementa con propostas de dinamización social, demográfica e económica coa intención de frear o despoboamento da área, facilitar o desenvolvemento económico e fomentar a rehabilitación. As Áreas Rexurbe están previstas para cascos históricos que conten coa declaración de Ben de Interese Cultural.
A proposta Mondoñedo, que recolle unha superficie total de 4,45 quilómetros, afecta a 179 edificios en estado deficiente ou ruinoso e combinará actuacións públicas e privadas que se deberán concretar agora nun Plan de Dinamización que elaborará o concello e que contará co apoio económico da Xunta a través de diferentes departamentos. No mesmo deberá analizarse "o estudo dos distintos usos alternativos, a análise, no seu caso, das modificacións urbanísticas precisas e a elaboración dun plan de financiamento" para a zona.
