Mariasun Landa recibe o nomeamento de Escritora Galega Universal 2020

A Asociación de Escritoras e Escritores en Lingua Galega (AELG) deu a coñecer este 29 de novembro nome da persoa recoñecida como Escritora Galega Universal 2020. A entidade acordou recoñecer o labor da autora vasca Mariasun Landa "desde o profundo respecto e afecto á súa persoa e a valoración da altísima calidade literaria da súa obra, así como por ter defendido e defender a lingua, a cultura e a dignidade nacional de Euskal Herria".



Landa recollerá este galardón honorífico na vindeira edición da Gala do Libro Galego, que se desenvolverá en Compostela o vindeiro 9 de maio de 2020, organizada pola AELG, a Federación de Librarías de Galicia e a Asociación Galega de Editoras.

Landa conta cunha extensa carreira literaria que lle reportou múltiplos recoñecementos, como o Premio Euskadi de Literatura Infantil e Xuvenil, o Premio Nacional de Literatura Infantil e Xuvenil do Ministerio de Cultura de 2003 ou o Premio Rosalía de Castro do Centro PEN Galicia.