O II Premio de Poesía Florencio Delgado Gurriarán vai para Raúl Gómez Pato

O ourensán Raúl Gómez Pato recibía onte o II Premio de Poesía Florencio Delgado Gurriarán que convoca o Concello de Vilamartín de Valdeorras co apoio da Deputación de Ourense. O seu texto Vinte, desolación valeulle facerse co premio de 3.000 euros desta xeira. Rafa Vilar con Das Kapital, Beatriz Martínez-Sayanes de Sáa con Sen menosprezar aos caniches e mais Roberto Rodríguez González e o seu Adolescencia en segunda persoa foron os finalistas, que serán publicados canda ao traballo gañador. O certame recibiu 212 traballos nesta segunda xeira, dos cales unha trintena foron eliminados por non cumprir as bases.

Xulio Pérez Veiga, Pilar Pallarés, Francisco García Macías, Ramón Nicolás e mais Jorge Moral Vidal foron os responsables da selección dos premiados. O certame convócase no marco do proxecto As letras de Florencio que reclama para este autor a homenaxe no Día das Letras Galegas. O premio recoñece obras de entre 15 e 90 versos inéditas e escritas na nosa lingua.