Berta Dávila faise co XXXI Premio de Novela Manuel García Barros

A autora recibirá 9.000 euros pola súa novela Carrusel

O xurado do Premio de Novela Manuel García Barros daba a coñecer onte o fallo da XXXI xeira do galardón que organiza o Concello da Estrada. A obra Carrusel da autoría Berta Dávila impúxose neste certame a atender á súa "depuración estilística, o traballo lingüístico e o coidado das imaxes", que nos achegan a un "mundo interior gobernado pola autenticidade dos sentimentos", segundo destaca o fallo do xurado.

Eulalia Agrelo Costas, Carlos Lema, Armando Requeixo, Inma Otero e Carlos Loureiro, actuando como secretario foron os responsables da selección dunha obra na que, segundo a editorial Galaxia, que será responsable da publicación, "unha narradora magoada polas súas experiencias precisa revisar os camiños andados e as relacións afectivas que pularon pola súa faceta de escritora. Unha proposta narrativa construída a través de varias trabes dicursivas que, con cada reviravolta, engade un detalle que resultará fundamental para a trama na que se combina a sensualidade, a dor e a ilusión coa lóxica das ciencias como ancoraxe racional do incomprensible". A autora recibirá un premio en metálico de 9.000 euros.