Marta Otero Mayán, estudante de 4º de Xornalismo na Universidade de Santiago, é a gañadora da sexta edición do premio universitario de comunicación científica "Contar a Ciencia-la Caixa", que convoca a Real Academia Galega de Ciencias, e está patrocinado por Obra Social la Caixa. A súa reportaxe, Unha app para coidar a quen coida, expón un proxecto do Grupo de Investigación en Saúde Mental e Psicopatoloxía da USC para previr a depresión en coidadores de persoas dependentes. Na súa decisión, o xurado do certame valorou o enfoque humano do traballo de Marta Otero, onde se aborda un proxecto do Grupo de Investigación en Saúde Mental e Psicopatoloxía da USC para previr a depresión en coidadores de persoas dependentes. O xurado, composto por representantes da Real Academia Galega de Ciencias, Obra Social la Caixa, Colexio de Xornalistas de Galicia, CSIC, Consellería de Educación e GCiencia, tamén escolleu como finalistas ás reportaxes Scuba Cancers, de Andrea Varela e Miriam Álvarez, e Como gañar o que che quita o Parkinson, de Alba Tomé. A gañadora do Premio Contar a Ciencia-la Caixa recibirá un premio en metálico de 500 euros e un smartphone. Nesta sexta edición do premio participaron dez traballos de estudantes de comunicación das facultades galegas. As reportaxes abordaron, en formato escrito e audiovisual, proxectos de investigación que se desenvolven en Galicia. Todos os finalistas recibirán o seu galardón nun acto que terá lugar o 8 de xullo no Pazo de San Roque de Santiago de Compostela.
