Xa está dispoñible na tenda de aplicacións móbiles Google Play o Dicionario Galnet, o maior dicionario plurilingüe de galego. Este proxecto desenvolvido polo Seminario de Lingüística Informática da Universidade de Vigo achega traducións e sinónimos para dez linguas: galego, portugués, catalán, vasco, español, inglés, alemán, latín, italiano e chinés. A obra reúne un total de 725.000 termos, dos que 70.000 corresponden a verbas en galego. A publicación fai parte do proxecto Wordnet, que facilita o labor dos programas informáticos de procesamento de linguaxe para deducir o significado das frases en diferentes idiomas.
