Capa do libro
O Servizo de Publicacións e Intercambio científico da Universidade de Santiago ven de sacar do prelo un libro dedicado a Antonio Fraguas, homenaxeado deste ano polo Día das Letras Galegas. O volume Antonio Fraguas. A cultura como forma de vida é unha edición ao coidado de Nieves Herrero e María Xesús Nogueira que apela á memoria dun intelectual, investigador e docente vocacional e xeneroso que, malia puntuais incursións nos estudos literarios e mesmo na creación, consagrou a súa vida a disciplinas das ciencias sociais e humanas como a historia, a xeografía, a arqueoloxía e, de maneira destacada, a especialidades situadas no eido da antropoloxía sociocultural, como a etnografía e o folclore. Nos traballos que inclúe este volume nas súas 266 páxinas, a tradición etnográfica, a oralidade e a literatura popular -campos vizosos da cultura galega- fúndense coa experiencia vital para ofrecer unha visión completa e novidosa de Antonio Fraguas e a súa inxente herdanza.
