Unha proxección do documental Vértice de versos na Casa das Campás de Pontevedra abre esta tarde a novena edición de PontePoética. O festival internacional de poesía da Cidade do Lérez reserva o groso das súas actividades para a fin de semana. Así, a partir do venres, desenvolveranse recitais individuuais e colectivos de Manuel Vilas, Valter Hugo Mâe, Jan Wagner, Antònia Vicens, Castillo Suárez, Baldo Ramos, Pilar Pillarés, Ismael Ramos e Silvia Penas en lugares como as ruínas de Santo Domingo e o Teatro Principal. Un obradoiro de narrativa don Manuel Vilas e o espectáculo poético-musical de Cintaadhesiva completan a proposta. Segundo adianta Yolanda Castaño, directora do evento, os convidados inclúen "un Premio Nacional de Poesía, as galardoadas co Premio da Crítica en galego e en catalán, o autor máis carismático das letras portuguesas actuais ou o fenómeno editorial da literatura española".
