O IIº festival Alguén que respira! expande tres xornadas a celebración do Día da Poesía

Xuntarase o colectivo Ronselz e Méndez Ferrín fará o Manifesto Galego da efeméride

Santiago volve celebrar o Día Mundial da Poesía, este 21 de marzo, cun amplo programa da segunda edición do Festival de Poesía para Corpo Principal Alguén que respira! que se desenvolverá no Teatro Principal entre os días 21 e 23. O festival comezará coa primeira reunión ao completo do colectivo Ronseltz, que estivo en activo a mediados dos anos oitenta. Sobre o escenario do Teatro Principal xuntaranse Xabier Cordal, Manuel Cortés, Xoán Carlos Rodríguez, Serxio Iglesias e Miki Nervio, os cinco integrantes deste grupo caracterizado polo uso do humor e a ironía. Tamén na primeira xornada celebrarase o acto central do programa, cun recital a cargo de Xosé Luís Méndez Ferrín, encargado de ler o Manifesto galego do Día da Poesía que el mesmo redactará. Tamén intervirán Pilar Pallarés e Estevo Creus, en representación de Galicia, Golgona Anghel pola lingua portuguesa, Sònia Moll pola catalá e José Luis Piquero polo castelán. O acto será pechado por "unha das figuras máis fascinantes da poesía mundial", o chileno Raúl Zurita. Máis de medio cento de poetas, músicos, actrices e actores participarán en diferentes actos os tres días. García MC e LAR Legido, Rabuda e Nuria Vil, Margarita Ledo, Ana Romaní e Chus Silva, Mónica Caamaño e Alfredo Rodríguez presentarán creacións de estrea absoluta no festival. Antón Lopo, director artístico do evento, explicou na presentación que este festival está "destinado a unir vínculos entre autores e lectores e escoitadores, pero tamén está pensado para ser un espectáculo en si mesmo, para poñer en valor a poesía como elemento dinamizador da nosa cultura e mesmo como elemento con capacidade de dinamización económica".

A xornada do 22 de marzo estará dedicada á oralidade, cun slam, unha sesión de bertsolaris vascos, Jon Maia e Amets Arzallus, e un recital de propostas que mesturan a música e a poesía. O slam é un torneo de poesía, no que os participantes enfróntanse a través de recitais dramatizados, con rondas na que cada participante ten uns minutos para ler os seus textos. O torneo estará conducido por Esther Carrodeguas, contará con música de Juanma LoDo, e sobre o escenario bateranse Iolanda Zúñiga, Oriana Méndez, Carmen Conde, Vanessa Glemsel, Luix Kaf, Malvares de Moscoso, Clara Gayo e Silvia Casal. A axenda do venres completarase cun recital de "poesía sen etiquetas" que reúne a García Mc & LAR Legido, nun proceso de improvisación que mestura o hip hop co jazz experimental; Lucía Aldao, unha referencia na poesía oral galega; e Pablo X Suárez e Dudu, que se xuntan no proxecto !El Velcro".

Xa na terceira xornada do festival, está prevista a estrea do proxecto poético e musical no que colaboran a poeta Nuria Vil e a banda de rock, psicodelia e new wave Rabuda. Ademais, o programa chegará aos recunchos máis inaccesibles do Teatro Principal coa sección "Atravesei a cerca", na que participarán Gonzalo Hermo, Elena Medel, Ana Romaní e Chus Silva, Alejandro Palomas e Margarita Ledo. Todos eles protagonizarán accións individuais para grupos reducidos de vinte persoas cada un. O festival Alguén que respira! clausúrase cun recital de grande intensidade, que reunirá no escenario a sete artistas que desenvolverán unha complexa visión sobre a poesía e, polo tanto, sobre a vida. Serán o actor Alfredo Rodríguez e a actriz Mónica Caamaño, cun traballo sobre versos de Jesús Castro, Xela Arias, Olga Novo ou Chus Pato; Afonso Tarficante, que estreará a produción Zunido, na que recitará acompañado por un vibráfono; Félix Fernández, que recuperará os textos do seu irmán Xabier Fernández no oitavo aniversario da súa morte; Silvia Penas, cun traballo sobre as cantigas de amigo encargado polo festival; o popular rapeiro Hard GZ, unha das figuras emerxentes do hip hop español e, por último, a brasileira Elisa Lucinda.

Actividades paralelas
O festival "Alguén que respira!" complétase cun programa matutino que se desenvolverá no ambigú do Teatro Principal. Serán sesións de conversa con "Café con Moha", sobre temas vinculados coa poesía, como a importancia do corpo nas novas linguaxes líricas, o escenario como soporte, a esencia do poema ou o reto de publicar poesía na actualidade. Na iniciativa participarán poetas como Raúl Zurita, Elena Medel, Marta Dacosta, Henrique Alvarellos, Pablo X Suárez, Sònia Moll, Mario Regueira, Wladimir Vaz, Miguel Anxo Fernán Vello, Mónica Caamaño, Luís Tosar ou Elisa Lucinda. Exercerán como moderadores recoñecidos xornalistas como Daniel Salgado, María Obelleiro, Caetano Díaz, Francisco Novo e Anxo Quintela.