Un mapa retrata a Galicia das cidades asulagadas

A cooperativa cultural MaOS Innovación social publicou un mapa de acceso aberto no que recompila "unha das nosas tradicións máis fermosas e parte fundamental do noso patrimonio inmaterial", a lenda das Cidades Asulagadas. Vinculadas a lagoas e ríos de todo o país, o mapa permite apreciar a localización de 37 cidades míticas das que se conserva unha memoria na tradición oral. Da cidade de Valverde, na lagoa do Carregal, en Ribeira, ata Antioquía, na antiga lagoa de Antela, na Limia, ou de Duio en Fisterra a Bandomil, en Vilalba. De boa parte delas consérvase a historia dunha antiga cidade mergullada baixo as augas tras un castigo divino.