Fredi Leis e Xoana semifinalistas en seis premios MIN encabezan a representación galega

A terceira fase dos Premios MIN da música independente ven de iniciarse dando paso ás votacións do xurado profesional sobre os semifinalistas decididos na meirande parte das categorías polo votos populares. A escena musical está representada en moitas categorías entre os semifinalistas. Ata 22 artistas ou formacións galegas entran nesta fase de votacións pasando o corte entre as 30 candidaturas máis votadas polo público. Nese sentido dous artistas galegos demostraron a maior capacidade de mobilización do voto popular: Fredi Leis e Xoana. Tanto o cantautor compostelán co seu álbum Neón, como a porriñesa Xoana con Dardos, acadan cada un ata seis postos semifinalistas noutras tantas categorías, competindo en case todas elas entre si. Ademais deles dous, tamén conseguiron acadar un importante apoio popular as dúas propostas galegas vencelladas ao Hip Hop e as músicas urbanas: HardGZ e Ezetaerre. Os catro compiten entre si ao premio ao mellor videoclip cos seus respectivos sinxelos de lanzamento dos seus traballos do 2018.

Leis e Xoana son os únicos músicos galegos que compiten polo premio ao Mellor Álbum a nivel nacional e tamén á mellor Produción Musical. Ambos están tamén nos postos semifinalistas do premio a Mellor Álbum Pop, xunto co grupo vigués Basanta. No premio á Mellor canción Fredi leis está presente con Sálvate, Xoana con Mártíres e nesa categoría entra tamén Hard GZ con Love. O rapeiro compite entre outros 29 como mellor artista con Novedades Carminha e na categoría propia dos albumes de Hip Hop e música urbana está como semifinalista polo seu disco Versus e tamén aí están os composteláns Ezetaerre con Pólvora e tormenta. A presenza de artistas de Galicia entre os semifinalistas faise sentir especialmente na categoría de Mellor Artista Emerxente; xunto aos citados Fredi Leis e Xoana están tamén Ezetaerre, Basanta, Tanxugueiras e a ourensá Marem Ladson. Abe Rábade Trío, con Doravante e Baldo Martínez con Cuarteto Europa, fan a nosa representación entre os premios aos discos de Jazz; Mercedes Peón con Deixáas e Mounqp con Castro verdi acadaron so apoios para entrar como semifinalistas entre os mellores traballos de música electrónica e Disco Las Palmeras! Fixeron o propio no premio ao Mellor Disco de Rock con seu Cálida optando a ese recoñecemento.

Na categoría de Músicas do Mundo & Fusión son catro as propostas xurdidas da escena galega que se colocaron entre as trinta semifinalistas grazas ás votacións populares. Noró, de Xabier Díaz & Adufeiras do Salitre entrou na lista grazas aos seus 194 votos recibidos; Susana Seivane con Fa, Germán Díaz & Benxamín Otero con 13 cancións bonitas e Tiruleque con Outro que tal baila completan a nosa representación. Finalmente na categoría de premio ao mellor disco en galego do ano 2018, a lista de candidaturas era de doce, inferior aos 30 de corte que especifican as bases, polo que todos son semifinalistas.