O santiagués Luís Zahera gaña o Goya ao mellor actor de reparto

O premio Goya que este sábado recolleu Luis Zahera (Santiago, 1966) como Mellor Actor de reparto pola súa participación na película El Reino foi recibido con alegría no audiovisual galego. A Asociación de Actores e Actrices de Galicia apresurouse a felicitar ao seu asociado a través das redes sociais polo recoñecemento acadado da Academia de las Artes y las Ciencias Cinematográficas de España, o mesmo fixo o alcalde de Santiago Martiño Noriega, así como outros moitos actores e actrices que teñen traballado con Zahera no seu percorrido profesional, como é o caso de Isabel Blanco, coa que compartiu os rodaxes da serie Mareas Vivas (1998). Foi nesta serie, co seu personaxe de Petroleo, onde Zahera acadou unha enorme popularidade entre o público galego. O actor compostelán comezou a súa carreira no teatro ás orde de Roberto Vidal Bolaño en Días sen gloria (Teatro do Aquí,1991) e o seu primeiro rexistro no audiovisual foi na curtametraxe O Matachín (1996), dirixida por Jorge Coira. Zahera, é un deses secundarios de luxo que fan destacar as súas personaxes, froito diso recibiu xa en catro ocasións o Premio Mestre Mateo do audiovisual galego ao mellor actor de reparto grazas á participación en producións como Concursante (2006), Celda 211 (2009) ou Todo es silencio (2012). A súa interpretación gañadora en El Reino foi tamén recoñecida nos Premios Feroz da Asociación de Informadores Cinematográficos de España (AICE) como mellor interpretación masculina de reparto.

Con este Goya para Luís Zahera, xa son dous os que veñen para a capital galega sumándose ao da actriz Nerea Barros como Mellor Actriz revelación en 2015 por La isla mínima. Do resto das candidaturas ás que este ano optaban producións ou cineastas galegos foi a película de Dani de la Torre La sombra de la Ley a que conseguiu sumar ata tres estatuíllas nas categorías de Mellor Dirección de Fotografía (Josu Incháustegui), Mellor Dirección Artística (Juan Pedro de Gaspar) e Mellor Vestiario (Clara Bilbao). Dun xeito tanxencial outro dos Goya tocou á banda de rock Agoraphobia, cuxa canción Night of the living dead forma parte da banda sonora da curtametraxe Cerdita, gañadora do Goya nesa categoría.