Turismo presenta en Fitur novos produtos turísticos arredor do patrimonio

A presenza galega en Fitur, a feira internacional de Turismo que abriu onte as súas portas en Madrid, con cunha ampla representación do patrimonio e da cultura do país. Entre os novos produtos que Turismo de Galicia presentou no evento está Un paseo de historia e vida, un proxecto que propón percorridos por 30 cascos históricos do país a integrar cultura, compras e gastronomía. Canda a isto, A Ruta dos fenicios no Atlántico-As Cassitérides permitirá coñecer desde o mar os vertixios fenicios que se conservan no noso país, mesturando a experiencia de minicruceiros con propostas de realidade aumentada.

O posto galego na feira ten tamén espazo para a promoción dos tres espazos galegos que actualmente se están a propor para obter a declaración de Patrimonio da Humanidade pola UNESCO, Cíes-Illas Atlánticas, Ribeira Sacra e Cidade de Ferrol: Porto da Ilustración. Da man da Consellaría de Medio Ambiente, pola súa banda, preséntase a primeira guía de viaxes para coñecer as árbores senlleiras do noso país. Elaborada a partir do catálogo que recolle estes exemplares, a proposta inclúe rutas que permiten caoñecer 50 dos exemplares e formacións máis salientables do país.