A domus do Mitreo de Lugo abre de novo as súas portas

Desde onte a Domus do Mitreo, o emblemático espazo arqueolóxico lugués que agora xestiona directamente a Universidade de Santiago de Compostela, volve abrir as súas portas. Nesta nova etapa, o horario ampliarase para estar abertos de martes a domingo e o primeiro mércores do mes o acceso será gratuíto. O museo está estruturado en tres niveis, ocupando 700 metros cadrados e, segundo a USC, "constitúe un exemplo excepcional da historia urbana da cidade de Lugo". O centro acolle os restos dunha vivenda altoimperial e o seu elemento máis destacado é un espazo sacro dedicado ao deus oriental Mitra, un dos mellor conservados do occidente europeo.