As bibliotecas incorporan filmes ao seu catálogo de préstamo electrónico

Un total de 77 películas de 24 produtoras galegas están dispoñibles desde onte para o seu visionado na plataforma de préstamo electrónico GaliciaLe. Este espazo, dependente da Rede de Bibliotecas de Galicia permite o visionado en liña durante dous días de cada unha destas películas logo do seu préstamo a cada usuario. A directora da Axencia para Modernización Tecnolóxica de Galicia, Mar Pereira, e o secretario xeral de Cultura, Anxo Lorenzo, presentaban onte este servizo, a destacar que as producións dispoñibles inclúen obras premiadas internacionalmente como De profundis, Sicixia, A Esmorga, Mimosas ou Todos vós sodes capitáns entre outras.

Con estas incorporacións, a plataforma acolle un total de 1.609 libros electrónicos de diferentes editoras galegas, 77 filmes, 31 revistas, 50 audiolibros e un libro interactivo. A Consellaría de Cultura anunciou ademais a vindeira incorporación doutros 44 títulos entre libros e revistas nas vindeiras semanas.