Xulio Amigo
A dirección da asociación Culturgal acaba de facer público o nomeamento de Xulio Amigo, director comercial da Editorial Galaxia, como presidente desta entidade. Coa decisión, que se tomou hai un mes, Amigo substitúe no posto a Manuel Bragado. Segundo informa a asociación, o novo presidente está a traballar coas organizacións sectoriais que fan parte da Asociación na elaboración dun modelo estratéxico de Feira a catro anos cos obxectivos de conseguir estabilidade orzamentaria, a dixitalización dos procedementos de relación co público, provedores e expositores, a apertura da Feira a novos perfís de consumidor cultural e a favorecer o diálogo con artistas, creadores e axentes de culturas da contorna. Amigo ocupara xa o cargo no momento de constitución da Asociación Culturgal e foi substituído por Bragado, a quen agora colle o relevo.
