Preséntase o programa do Día das Letras

A Consellaría de Cultura, o Consello da Cultura e mais a Real Academia Galega presentaban onte o programa de actividades en homenaxe a María Victoria Moreno. Como é habitual, a autora homenaxeada neste Día das Letras protagonizará unha exposición que itinerará por diferentes localidades do país ao longo do ano. María Victoria Moreno. Paisaxes e personaxes, comisariada por David Pintor, achegará "unha galería de retratos de personaxes dos libros da autora e de paisaxes onde María Victoria Moreno situou as historias das súas obras". Tamén se celebrará da man do Consello da Cultura, o tradicional Concerto das Letras o día 16, coa estrea dunha peza musical composta por Miguel Matamoro.

A Real Academia Galega, pola súa banda, celebrará no Teatro Principal de Pontevedra o acto central do Día das Letras e ten previsto para os días 27 e 28 de novembro o simposio dedicado á escritora, que celebrará na súa sede da Rúa Tabernas, na Coruña. Ademais, a institución mantén o web Primavera das letras con diferentes contidos sobre a autora e a celebración.

Outras propostas propias da data, como son a V Carreira Camiño das Letras, as campañas impulsadas desde o ámbito empresarial da man de Feiraco, Vegalsa-Eroski e Pousadas de Compostela ou as accións de promoción nos trens de Renfe terán continuidade neste ano. Mostras bibliográficas e actividades en bibliotecas e arquivos, contidos específicos na rede e na CRTVG completarán o programa de actividades.

Como novidades, a Cidade da Cultura acollerá a iniciativa Eu conto, na que se desenvolverá unha lectura participativa de textos da autora ou un concerto de Clave de Fado no Castro de Viladonga o propio 17 de maio son outras propostas do programa.