Paula Carballeira en A carreta pantasma
As orixes de A carreta pantasma, a nova obra da compañía Berrobambán, hai que atopalas como se dun xogo de bonecas rusas se tratase. O espectáculo de narración oral que defende en solitario Paula Carballeira está baseado nun filme sueco do mesmo título do ano 1921, baseado á súa vez nun relato de Selma Lagerloff (Mårbacka, Suecia 1858-1940), a primeira muller en recibir un Nobel de Literatura, que o escribiu baseándose nunha crenza de orixe popular. A través de das tres historias que compoñen o espectáculo que este venres ás 20:30 hrs. a compañía teatral estrea no Pazo da Cultura de Narón, A carreta pantasma fálanos da morte, do medo e da memoria. Paula Carballeira ofrécenos coa súa interpretación un espectáculo singular no que se afonda nos límites entre a narración oral e o teatro no que se usan os mínimos artificios escénicos necesarios para amplificar o poder da oralidade e explorar a emoción. É, por tanto, un exercicio de sinxeleza. "Vivimos no inmediato e esquecemos con moita facilidade", di o texto de presentación da obra, "ás veces atopámonos sen saber onde ir, que facer, que pensar, porque esquecimos de máis e xa non nos recoñecemos no espello. A memoria colectiva ofrécenos identidade, e de memoria falan as tres historias que compoñen este espectáculo".
