O CCG acolle unha xornada sobre dereitos de autor

O Consello da Cultura Galega celebra hoxe unha xornada "Dereitos de autor, lei aplicable e percepción social", que analiza o novo escenario dos dereitos de autor, no ámbito cambiante das novas tecnoloxías. "Trátase dun proceso de transición, non rematado en todos os ámbitos, que nos afecta moi directamente, polo que debemos coñecelo o máis posible para movernos con garantías e aproveitar ao máximo as novas opcións no marco legal vixente", sinalan desde a organización da xornada, que se celebra ao longo do día de hoxe no Consello da Cultura Galega e para o que todas as prazas están cubertas. A xornada conta coa participación de José Ignacio Aguaded, Javier Díaz Noci e Raquel Xalabarder. Pódese seguir en directo no web do CCG.