Unhas xornadas analizan a participación dos artistas galegos na propaganda antifranquista da Guerra Civil

A Fundación Luís Seoane acolle ata o 1 de abril de 2018 a mostra ao redor dunha obra fundamental da plástica galega do século XX: as Trece estampas da traizón, un álbum ilustrado con trece debuxos de Luís Seoane (e unha portada) elaborados para a campaña de propaganda no exterior feita pola II República durante a Guerra Civil. Os debuxos denuncian a represión do bando franquista. Para analizar o seu contexto histórico, do 1 ao 3 de febreiro, a Fundación acollerá a xornada Guerra Civil, propaganda e artistas da Galiza, coa participación de Silvia Longueira, Xusto Beramendi, Emilio Grandío, Daniel Buxán, Eliseo Fernández, Pilar García Negro, Paulo Porta ou María Antonia Pérez.