Foto: Xunta de Galicia
Tres cistas (pequenas tumbas) prehistóricas localizadas no oeste da illa de Arousa, na punta de Riasón, están a ser intervidas arqueoloxicamente nestes momentos por iniciativa da Xunta. As tres tumbas atópanse na zona intermareal, é dicir, na praia, sometidas á forte erosión do mar. Trátase de pequenas cistas feitas con lousas de pedra. Os traballos, promovidos pola Dirección Xeral de Patrimonio, durarán 10 días e terán como obxectivo a escavación das estruturas e a busca de materiais na contorna. Os especialistas estiman que as tumbas poden ser do Calcolítico ou da Idade do Bronce.
