Robert Plötz, membro fundador do Comité Internacional de Expertos do Camiño de Santiago e un dos principais investigadores e dinamizadores das rutas xacobeas, falecía na noite do pasado venres 25 de agosto. Nado en 1942 en Nürnberg, Alemaña, e mantivo unha estreita vinculación coas peregrinacións a Compostela desde 1967, ano no que el mesmo realizou o Camiño. Autor de múltiples estudos sobre o fenómeno das peregrinación, dirixiu durante 25 anos a Irmandade Xacobea de Alemaña e desenvolveu un activo papel na dinamización do asociacionismo arredor das rutas. O seu labor valeulle en 1999 a Medalla de Ouro da cidade de Santiago de Compostela, en 2001 a Medalla de Galicia, na súa categoría de prata pola Xunta de Galicia, e en 2004 a cruz de mérito de Alemaña.
