O Carballo Interplay amplíase cara aos contidos dixitais na súa cuarta edición

Logo de nacer como un evento centrado nas webseries, o Carballo Interplay (CIP) dá na súa cuarta edición un paso máis "explorando os formatos máis diversos e os contidos dixitais máis novidosos" segundo adianta a organización do evento. Onte presentábase a nova xeira do evento, cun programa no que destaca unha importante presenza feminina, con Youtubers como Soy una pringada e Carolina Iglesias. Nos contidos apóstase tamén por abordar a problemática da profesionalización no campo dos contidos audiovisuais por Internet, coa presenza de traballadores de diferentes medios.

No campo das estreas, evento acollerá a presentación da longametraxe Fogueo de David Sainz e Teresa Segura, e mais da webserie Peter Brandon, coa que Porco Bravú gañaron o premio ao mellor proxecto de webserie en galego na última xeira do evento. Un pitching de proxectos e webseries en galego, un repaso pola traxectoria da compañía Chévere da man dos seus membros, obradoiros de robótica e stop motion ou un panel sobre A televisión nos tempos do Twitter son outras propostas que fan parte do programa. O festival celebrarase entre o 4 e o 6 de maio vindeiros, e está aberto o prazo de inscrición para webseries en galego e mais para os obradoiros da sección FormaCIP.