Desde a Fundación que leva o nome da poeta, hoxe presentan o primeiro número da revista Follas Novas, e mañá reparten entre Compostela e Padrón a súa axenda, que inclúe un acto institucional no Hostal dos Reis Católicos e un concerto de Ialma. Tamén en Compostela se celebrou esta mañá a homenaxe da Deputación da Coruña, ante a estatua a Rosalía situada na Alameda. No evento distribuíuse o libro Quen fora pedra que recolle unha investigación de Miguel Anxo Seixas sobre a historia deste monumento. Boa parte das actividades que se están a ver nestes días intégranse nas propostas que realizou a Asociación de Escritores en Lingua Galega baixo o lema RosalíaTe. Deste xeito, lecturas públicas, ofrendas florais, un concurso de videopoemas ou a iniciativa de agasallar libros en galego e flores fan parte desta iniciativa.
Fóra do país, o Centros de Estudos Galegos súmanse á efeméride coa iniciativa Rosalía Universal, pola que estudantado de galego de diversas universidades europeas e americanas enchen a rede con lecturas e interpretacións de poemas.