Santiago de Compostela abrirá unha Casa dos Monicreques

Unha das vellas arelas da compañía Monicreques de Kukas, contar un espazo no que amosar o material de case corenta anos de traballo no mundo dos títeres, vaise facer realidade. O Pleno do Concello de Santiago do pasado 19 de xaneiro aprobou por unanimidade unha proposición do grupo municipal do BNG para crear a Casa dos Monicreques. A iniciativa empraza ao goberno local a asinar "un convenio de colaboración con Monicreques de Kukas para a cesión, musealización, exposición e difusión do legado desta compañía histórica de teatro co fin de enriquecer a oferta cultural de Santiago de Compostela". Segundo anunciou a propia compañía a través do seu Facebook, o novo espazo "nace con vocación de servizo aos nosos veciños, pero tamén con visión de proxección universal da arte dos monicreques e da cultura e lingua galegas".