A música viguesa viviu onte unha noite de festa e recoñecementos coa entrega dos Premios da Música Maketón na súa 16ª edición. Os galardóns que levan o nome dun programa local da emisora Los 40 simbolizan o traballo por e para a escena musical viguesa e contan co patrocinio da sidra MAELOC. Na gala presentada por Emma Placer na Sala RADAR entregáronse as seis estatuíñas deseñadas por Gonzalo Dapresa, cada categoría contaba con cinco finalistas. O gaiteiro Anxo Lorenzo recibiu o Premio á Mellor Traxectoria Musical e a banda de rock Aphonnic o de Mellor Disco por Indomables, editado por Malditos Records. O Premio ao mellor Directo foi para a banda de hard rock Cherokee, na categoría de mellor videoclip de grupo local, o premio foi para oa veterana formación Tronka jazz quartet polo video da canción Tu vieja me Pone. Os premios Maketón recoñeceron como mellor produtor do ano a Luis Antelo un referente que leva anos traballando en Estereoarte Estudios con artistas como Iván Ferreiro ou Ragdog entre outros. Un dos seus último traballos, Enefene, do grupo Dallasgracias foi o gañador do Premio ao Mellor Disco Autoproducido do ano. Os grupos locais Presumido e Basanta tocaron en directo no evento.
