O festival polipoético de Vigo pega o seu estirón e enche a cidade

A 6ª edición do Festival Internacional Kerouac Vigo de Poesía e performance encherá a cidade de accións artísticas durante catro días. O festival polipoético pega nesta edición un estirón considerable pasando de ser unha única xornada nas edicións anteriores a estes catro días completos nos que se poderá escoitar poesía en 8 idiomas diferentes, dacordo á súa característica de internacionalidade. Autoras e autores dos Estados Unidos, Bulgaria, Croacia, Estonia ou Líbano, ademais de xente do resto de España e de Vigo e Galicia en xeral enchen un programa de actividades case constantes. No evento, que se dedica á figura do poeta americano Jack Kerouac (1922-1969), caben todo tipo de representacións artísticas da expresión poética máis ala da propia lectura ou declamación: performance, teatro, música, visuais, happenings, baile ou a combinación de todas elas. Malia que a inauguración oficial farase o vindeiro xoves 20 de outubro, será hoxe coa proxección do biopic On the road, sobre Jack Kerouac nos Multicines Norte de Vigo, cando se dá saída ás actividades.

O Festival Kerouac aposta este ano con forza por achegar a poesía a tódolos públicos, con máis accións na rúa, músicos recoñecidos a nivel internacional que agora se achegan a poesía, conversas e mesas redondas, actividades para nenos e recitais en colexios. O Poemovil , un automóbil con megafonía, espallará poesía polas rúas da cidade e no ferry entre A Guarda e a localidade lusa de Caminha terá lugar Poetry on board, un acto de declamación a bordo no que tomarán parte a poeta americana Melissa JAckson e a pontevedresa Noelia Toledano. Por segundo ano consecutivo o festival terá tamén o seu eco ao outro lado do Atlántico cunha edición na cidade de Nova York, como xa ocorrese no 2016. Daquela o evento celebrou as súas actividades no Instituto Cervantes NY, e no Bowery Poetry Club. Agárdase poder celebrar esta edición americana no mes de abril como a anterior.