Nova Galicia Edicións recupera as Conversas con Manuel María

Xosé Manuel del Caño anda esta semana a presentar un vello libro. O volume Conversas con Manuel María que publicou en 1990 volve á rúa da man de Nova Galicia Edicións, nunha nova versión actualizada que inclúe un prólogo de Darío Xohán Cabana, un apéndice literario do propio Del Caño e mais un CD que recolle a voz do poeta ademais de varias versións musicadas dos seus textos. En paralelo, o Centro Ramón Piñeiro para a Investigación en Humanidades presentaba o pasado seis de outubro o número 35 dos seus Cadernos, un monográfico dedicado tamén ao autor chairego a quen se lle dedicou este ano o Día das Letras. Manuel María: cecais hai unha luz. Memorabilia é o título do volume que recolle vinte e sete estudos sobre diferentes facetas de Manuel María ademais de medio cento de cartas. Ana Acuña, Luís Alonso Girgado, Darío Xohán Cabana, Francisco Fernández Naval, Manuel Forcadela, Xosé Luís Franco Grande, Xosé Ramón Freixeiro Mato, Salvador García-Bodaño, Pilar García Negro, Luís Gonçales Blasco, Margarita Ledo, Antón Lopo, Camiño Noia, Mercedes Queixas, Xesús Rábade, Armando Requeixo ou Claudio Rodríguez Fer son algúns dos autores que participan.