Nace O Papagaio, unha revista escolar en galego

Un xornal en papel orientado a lectores de Educación Primaria e Secundaria, escrito integramente en galego e a toda cor. Esta é a proposta de O papagaio, unha nova publicación mensual que a editorial Moito Conto acaba de presentar. O proxecto achega doce páxinas e dez números ao ano con seccións dedicadas a ciencia, tecnoloxía, ecoloxía, historia, arte, cultura, integración ou banda deseñada e ofertas especiais para colexios. O primeiro número esta xa dispoñible na rede.

Pola súa banda, a Revista Galega de Educación que publica Nova Escola Galega acaba de lanzar o seu número 65, dedicado de xeito monográfico á situación do galego no ensino infantil. Da man de diferentes especialistas no ámbito, a revista aborda as problemáticas da nosa lingua nesta etapa e presenta distintas iniciativas orientadas á normalización lingüística nos primeiros anos de vida. Marcos Maceira, Nel Vidal, Xaquín Loredo, María Belén Escariz Ferrín, Francisco López ou Marta Besada son algúns dos autores dos textos.