Capa da Revista Galega de Educación 50
O Consello da Cultura Galega acollía esta mañá a presentación do número 50 da Revista Galega de Educación, publicación de Nova Escola Galega. Este número de aniversario fai repaso de 25 anos de ensino no noso país e dos contidos que traballou a publicación no período. Entre outras cuestións, trátase a evolución da literatura infantil e xuvenil neste tempo, achégase unha entrevista con Avelino Pousa Antelo e recupéranse artigos de números anteriores sobre temas como a Lei de Normalización Lingüística ou as distintas políticas educativas que se deron no país. Segundo adianta o director, Xesús Rodríguez Rodríguez, a entrega permite un achegamento ás máis de 6.000 páxinas de contidos.
