"Agustín forma parte de nós", asegura Manuel Bragado, editor de Xerais, "como editores, o noso maior compromiso e manter a súa memoria literaria e ampliar a comunidade de lectores". Para iso a editorial vén de publicar o catálogo 2016 Agustín Fernández Paz, do que editou 6.000 exemplares que está a repartir en bibliotecas, centros educativos e a persoas interesadas, ademáis de poñerse a disposición do público de maneira gratuíta no vindeiro cultur.gal.
O catálogo é a primeira publicación que Xerais realiza da obra de Fernández Paz trala morte do escritor, que estivo moi vinculado á editorial e na que foi mesmo director da colección Merlín, onde organizaba os títulos por idades aproximadas de lecturas. Proximamente Xerais realizará a edición conmemorativa 100.000 de Cartas de inverno, con ilustracións de Antonio Seijas, celebrando os 100.000 exemplares vendidos desta publicación, e a reedición do seu libro O soño do merlo blanco. "Trátase dunha auténtica reescritura", afirma Manuel Bragado, "xa que o libro foi publicado inicialmente en 1999 pero Agustín tiña unha idea moi testemuñal deste libro".
Para Manuel Bragado, o legado literario de Agustín está na creación de lectores en galego. "El soñaba coa formación do lector literario", sinala Bragado, "e a súa contribución foi decisiva para a construción deses públicos que hoxe existen na literatura galega, desas dúas xeracións que hoxe se incorporan como lectores".
