Oito autores homenaxean a David Rubín cunha exposición colectiva en Arxentina

Realizar unha banda deseñada colectiva co método do cadáver exquisito a partir da obra do ourensán David Rubín. Esta é a proposta de Rubinesco (un cadáver tributo), unha actividade e exposición que se poderá ver a partir das sete da tarde do seis de outubro no Centro Cultural España Córdoba, situado nesta cidade arxentina. O proxecto conta con traballos a cargo dos arxentinos Paula Andrade, Nicolás Brondo, Alfio D’Antona, Hernán González, Gabriel Heredia e Manu Loza, do uruguaio Richard Ortiz e mais a coruñesa Xulia Pisón. Cada un dos participante elaborará un cadriño co que se comporá unha obra común.

A actividade desenvólvese de xeito paralelo ao segundo festival Docta Cómics, no que estará presente o propio Rubín en distintas sesións de sinaturas e nun taller de creación. Ademais, o Centro Cultural España Córdoba acolle tamén desde mañá a exposición Exposición Miguel EN Cervantes. El retablo de las Maravillas na que se poden ver as adaptacións que realizaron Rubín e Miguelanxo Prado da vida e obra do autor do Quixote.