Co lema Erguendo pontes literarias esta mañá bota a andar en Ourense o 82 Congreso do Pen Club Internacional. A iniciativa que coordina a delegación galega da organización reúne na Cidade das Burgas un total de 250 escritores de diferentes países do mundo e achega un intenso programa. Mesas redondas, presentacións, relatorios e actividades teatrais e literarias ocuparán a cidade ata o vindeiro 2 de outubro. Entre os convidados, nomes como Claudia Piñeiro, Yolanda Castaño, Manuel Rivas, Laura García Lorca, Xosé Luís Méndez Ferrín, Nélida Piñón, Eric Lax, Paco Audije, Adam Michnik, Rui Madeira, António Barroso ou Luis García Montero. Como feche do encontro, o 1 de Outubro a Cidade da Cultura, en Compostela, acollerá a Homenaxe a Anna Politkovskaya e mais entrega dos Premios Rosalía de Castro a Almudena Grandes, Dina Salustio, Mariasun Landa e Alex Susanna.