Ernesto Suárez Is e Xandra Táboas Martínez levan o Premio Abrente

O XI Premio Abrente de Textos Teatrais, que se organiza no seo da Mostra Internacional de Teatro de Ribadavia xa ten gañadores. O xurado do galardón acordaba onte conceder ex aequo a vitoria desta xeira ao texto Fendas, de Ernesto Suárez Is e mais a Todo sobre Eva, de Xandra Táboas Martínez. Segundo explicou o comité de elección, "Todo sobre Eva é unha obra con temática urxente, necesaria e que arroxa luz sobre unha problemática global, a violencia simbólica sobre a condición de ser muller e a violencia de xénero". O xurado destacou que se trata dun texto "poético, con posibilidades moi abertas na súa escenificación. Un berro poético, social e escénico, que bebe da dramaturxia de Heiner Müller e da salmodia dos textos bíblicos".

Pola súa banda, Fendas "é un texto que fala sobre a memoria histórica contrapoñendo o máis escuro do noso pasado co que está sucedendo no noso presente. Amósase quizais con este texto que non están resoltas moitas das cuestións do pasado, que é preciso e oportuno traer aos nosos días". Ademais, "o texto ten unha grande actualidade. Remite ao concepto da vanalidade do mal formulado por Hannah Arendt, que expresa a xustificación dos feitos tráxicos sen querer asumir responsabilidades persoais e respondendo con exclusiva complicidade á autoridade".

O xurado estivo composto polas actrices Marta Pérez e Iria Sobrado, a dramaturga Esther Carrodeguas, a concelleira de Cultura de Ribadavia María López e mais o director da MIT, Roberto Pascual. O galardón está dotado con 3.000 euros e unha estatuíña do artista Manuel Rodríguez. Ademais, o concello poderá promover a montaxe dos textos gañadores a través da Mostra de Teatro.