Comezan os XXIX Cursos de lingua e cultura galega para estranxeiros

Un total de 63 estudantes chegados de 17 países participan na vixésimo novena edición dos cursos de verán de lingua e cultura galegas para persoas de fóra de Galicia Galego sen fronteiras, que celebraron o pasado venres a súa xornada de presentación. O programa, que organiza a Real Academia Galega coa colaboración do Instituto da Lingua Galega, a Secretaría Xeral de Política Lingüística e a Deputación da Coruña, combina a aprendizaxe da nosa lingua durante un mes con actividades culturais para o alumnado. Visitas á Real Academia Galega, á Fundación Rosalía, á Fundación Otero Pedrayo ou ao Museo do Pobo Galego combínanse con propostas com un espectáculo do dúo Aldaolado, un recital de novas voces poéticas ou un obradoiro de música galega a cargo da Central Folque.

Precisamente no acto de presentación destes cursos o secretario xeral de Política Lingüística, Valentín García, anunciou a vindeira apertura de dous novos centros de estudos galegos no exterior. Zürich, onde o proxecto conta coa colaboración da Universidade de Zürich e mais Tokio, onde o parceiro é o Instituto Cervantes, son as localidades que se sumana esta rede internacional de espazos universitarios que facilitan o coñecemento e a promoción da nosa lingua. Con estas incorporacións serán un total de 37 centros por todo o mundo os que participan da iniciativa.