Dani de la Torre continúa a colleita de premios co Crea

El desconocido continúa a súa colleita de premios. Logo de arrasar nos Mestre Mateo, Dani de la Torre recollía este sábado o premio Crea á mellor dirección de longametraxe polo seu traballo neste filme. Estes galardóns que convocou por vez primeira a Asociación de Directores e Realizadores Galegos nacen coa intención de recoñecer os traballos da industria audiovisual do país. No palmarés tamén suma un premio á súa lista Psiconautas, de Alberto Vázquez e Pedro Rivero, que se fixo co galardón de animación.

Susana Sotelo e o seu Querida Gina foi considerado a mellor longa documental, Fran X. Rodríguez levou o premio á mellor curta de ficción con Ladrones de tiempo, mentres Xacio Baño vencía con Eco na categoría de curta documental. Rorschach#1 de Marcos Nine impúxose como mellor obra experimental, El método sueco, de Jorge Boquete foi a mellor webserie, o traballo de Olga Osorio para Heredeiros da Crus Buscando a superfama levou o galardón ao mellor videoclip, mentres Loida. Así eres, así somos deulle a Juan Galiñanes o trofeo á mellor campaña publicitaria. Gaspar Broullón e Simón Vázquez conseguiron o premio ao programa televisivo polo seu traballo en Éche así e Carlos Sedes viu recoñecido o seu traballo en Velvet co premio á mellor serie de TV.