Continúan as homenaxes a Manuel María a coincidir co Día das Letras Galegas que se lle dedica ao poeta. Deste xeito a Real Academia Galega anunciou que a casa-museo do escritor, situada en Outeiro de Rei, acollerá a sesión extraordinaria aberta ao público coa que esta entidade quere homenaxear o poeta o propio día 17. No acto, que comezará ás 12:30 horas, os académicos Manuel Rivas, Margarita Ledo e Darío Xohán Cabana repasarán a traxectoria vital e artística do homenaxeado.
Pola súa banda a área de Cultura da Deputación da Coruña presentaba onte o seu programa de actividades arredor da figura do poeta. Unha curtametraxe de videopoesía, dirixida por Juan Lesta e Belén Montero, unha lectura colectiva do poema colectivo Galicia, co que se artellará outra peza audiovisual, un obradoiro de poesía e ilustración ou un photocall itinerante son as propostas desta entidade.
Finalmente, da man de Xerais acaba de ver a luz Manuel María. Buscando un país. Este libro de Manuel Veiga achega unha interpretación sintética da vida e obra do autor acompañada das ilustracións de Víctor Tizón. Urco editora, pola súa banda, aproveitou a efeméride para reeditar Do A ao Z con Manuel María un libro de poemas co que Xosé Lois García homenaxea o poeta chairego e que fora publicado hai uns anos por Everest.
