A terceira edición do Día das Galegas nas Letras xa ten protagonista. A plataforma de crítica literaria A Sega publicaba esta mañá no seu web o manifesto Je suis... no que reivindica a figura de María Xosé Queizán e sinala esta autora e activista como protagonista desta xeira. "Antes de que fósemos modernas e falásemos do queer ela xa escribira vidas trans, lésbicas, fóra de ningún canon. Antes da reflexión sobre as reescritas ela regresara a Antígona, a Medea. Antes das intertextualidades ela puxera a orella no buraco para escoitar falas doutros lugares. Catou moitas bandeiras pero só para pasalas -con perdón- polo seu soberano cu e seguir sendo irreverentemente quen ela é", sinala o texto. Os actos de celebración desenvolveranse o vindeiro 15 de agosto.
