Edicións Positivas, firma que convoca anualmente o premio Narrativas Quentes, anunciaba onte, 20 de abril, o resultado da sétima edición deste certame. Corazón e demais tripas, de Emma Pedreira, impúxose na nova xeira do premio dedicado á literatura erótica. Segundo sinala a editora, o traballo destaca pola "excelente escrita, a fermosura das súas descricións e a precisión da linguaxe. Os rexistros son múltiples, desde os próximos ao realismo máis brutal ate a prosa poética. Sempre hai unha contención para deixar abertas outras posibilidades. Contención rodeada sempre de certo misterio". O traballo, ambientado maioritariamente entre o ámbito circense e o ambiente monacal, será publicado pola editorial.
