Rematan as primeiras xornadas de BD que se celebran na cidade de Pontevedra.

As primeiras xornadas de BD que se celebran en Pontevedra remataron cun aceptable éxito entre os afeccionados do país.


A pesar de que a participación foi máis baixa do que era de agardar en canto a público en xeral e que o lugar elexido (un pazo restaurado) non permitiu amosar a totalidade das obras colleitadas para expor, as mesas redondas e presentacións celebradas serviron para reflexionar sobre o medio en Galicia e para coñecer algo mellor algúns capítulos da historia da BD do noso país.



Así, a presentación do número dous de "BD Banda" realizada o martes 18 de decembro convertiuse nun dos actos máis multitudinarios das xornadas, cun cheo case total do salón de actos. Entre os presentes, unha nutrida representación da facultade de Belas Artes e varios debuxantes do país.
Non houbo tanta xente na presentación que ó día seguinte realizamos deste soportal, pero puidemos contactar con algún novo debuxante que seguro axiña estará nas nosas galerías.
O xoves vinte produciuse un interesantísimo encontron entre Kiko da Silva e Kike Benlloch, responsables de Polaqia e de "BDBanda", o últimos proxectos da novena arte en Galicia. Os dous discutiron sobre as vantaxes e inconvintes que ofrece a autoedición e fixeron un repaso da actitude das editoriais e das insitucións cara á banda deseñada, na que estas entidades non quedaron moi ben paradas.
Para o venres quedou o outro prato forte das xornadas. Varios antigos membros de Frente Comixario (Paradelo, Carvalho e Robledo entre outros) explicaron a súa experiencia como colectivo de autores e editores de BD e como antigos organizadores das Xornadas de Ourense.
A creación e evolución do colectivo, a súa disolución, os problemas cos que se atoparon e toda unha chea de cuestións desveláronse a un salón que estaba cheo a rebosar.
Na cea que se celebrou logo do peche das xornadas falouse abondosamente sobre proxectos e ideas dos que iremos informando segundo se concreten.



Na nosa sección de documentos podes descargar un arquivo en formato PDF no que podes ler unha crónica da charla sobre autoedición en Galicia ilustrada con fotos do evento.



Concluíndo, podemos falar dunhas xornadas nas que o único problema foi a falta de público non afeccionado. A elección do lugar, condicionada pola colaboración do Concello, supuxo sen dúbida un problema para que a participación fose o abondosa que se querería. Fóra diso, uns obradoiros ben levados por Jano, unha boa mostra, que non foi todo o grande que quería a organización e, sobre todo, unhas mesas redondas moi ben aproveitados apuntan a que estas xornadas poden chegar a convertirse nun referente á hora de reflexionar sobre a situacíón da BD no noso país.



A ver qué acontece coa seguinte edición.