Dúas salas de teatro independente e un cinema reciben 10 millóns da Consellería

As salas de teatro independente Galán e Nasa e o cinema Yago, de Compostela, recibirán dez millóns de pesetas da Consellería de Cultura a través do Instituto Galego de Artes Escénicas e Musicais. A axuda pretende colaborar no mantemento das actividades e espectáculos que realizan os tres escenarios.

Salas independentes

A sala Galán e a Nave de Servicios Artísticos (Nasa), son as dúas únicas salas de teatro independente existentes en Galicia. Situadas en Compostela, forman parte do circuito de salas independentes do estado. A súa programación inclúe desde actuacións teatrais de vangarda ata espectáculos musicais e humorísticos.
Pola súa banda o cinema Yago especialízase na proxección de películas externas ós circuítos comerciais.

Axudas ó funcionamento


Os dez millóns de pesetas que se repartirán entre as tres salas destinaranse ó mantemento das actividades que desenvolvan durante o ano. Dentro disto inclúese un apartado para a compra de material técnico e acondicionamento dos locais. Dos dez millóns, a sala Nasa e a Galán recibirán catro cada unha, e o cinema Yago dous. As tres salas acreditaron o seu funcionamento estable as dúas últimas tempadas e unha programación continuada dun mínimo de 65 funcións por ano.