Carlos Portela e Xulio Das Pastoras presentan en Francia o primeiro álbum da súa tetraloxía "Les Heresiarques", publicado por Humanoides Asociados.
A partir do sábado 26 de xaneiro os dous autores galegos comezan unha xira de promoción que os levará a Angouleme (o festival europeo de BD máis prestixioso) e a París dedicando exemplares e informando á prensa deste seu novo traballo. Estarán os tres días do certame na pequena localidade francesa e despois unha semana na cidade do Sena.
"Les Heresiarques" (Os Heresiarcas) é unha serie de fantasía do xénero de espada e bruxería escrita polo guionista Carlos Portela ("Gorka", "Impresiones de la Isla") que conta cuns espectaculares debuxos a cor de Xulio Das Pastoras ("Ustedes perdonen", "Kafre"). O apartado gráfico do ribeirán afincado en Barcelona ten reminiscencias de autores como Richard Corben e Moebius.
Portela cóntanos que xa comezaron a recibir as primeiras respostas á serie, e resultan moi positivas, especialmente as de profesionais que tiveron a ocasión de ver o álbume mesmo antes de ser publicado, como é o caso de François Boucq ("As Aventuras de Jérôme Moucherot").
Finalmente, o traballo no segundo tomo da serie vai moi avanzado, estando xa realizada unha cuarta parte do mesmo.
