"Opereta para voz narrada e cuarteto de clarinetes sobre un texto de Manuel María con música de Nani García". Así se presenta a edición que Galaxia acaba de presentar de A berenguela, obra teatral para crianzas escrita polo autor homenaxeado o vindeiro Día das Letras Galegas. O volume preséntase en formato libro-CD e acompaña o texto orixinal con ilustracións de Miguelanxo Prado. Os problemas dunha espiña de toxo coa xustiza e a autoridade serven de eixe para a obra. A narración da obra corre por conta de María Inés Cuadrado e o volume inclúe un limiar de Francisco Fernández Naval.
