Fonte: En memoria de tanto miragre. USC
Foi o primeiro catedrático emérito de Estudos Galegos no mundo anglófono, creou o Seminario de Estudos Galegos de Birmingham e o Centro Irlandés de Estudos Galegos en Cork. David MacKenzie, un dos máis destacados divulgadores da nosa cultura no estranxeiro, faleceu en Santiago de Compostela, onde residía. O traballo de MacKenzie, nado en Nottinghamshire en 1943, valeulle o recoñecemento co Premio da Cultura Galega na categoría de lingua en 2014. Ademais, era membro correspondente da Real Academia Galega, socio de honra da Asociación Internacional de Estudos Galegos e da Hispanic Society of América e Pedrón de Honra, entre outras distincións.
